Izakhamizi zeMawane eGwanda zithi ukuvulwa kwezikolo sekulethe omunye umthwalo kuzo ngesikhathi zilwisana lendlala.
Inengi kezakhamizi emaphandleni likhala ezimathonsi ngokuqonga kwentengo yamabhuku, amaunifomu kanye lembhadalo yezifundo eyama school fees, osekudale ukuthi abanye abantwana bengayi ezikolo.
Izikolo zivulwe kuliviki ngesikhathi inengi likhala ngokubhidlika komnotho wakuleli okudale ukuthi abanye abazali bachaphe imgcele besiyadinga ingwalo zabafundi kweleSouth Africa kanye leBotswana.
UMnu Andrew Dube isakhamuzi seMawane uthi inengi labazali litshaywa ngamakhanda ngendingeko zesikolo ngesikhathi bebhekane lendlala.
Esinye isakhamuzi uNkosazana Sithabile Mazondo uthi zinengi kakhulu indubo ababhekane lazo emaphandleni kulezinsuku.
UMnu Gabriel Moyo uthi mhlawumbe umnyaka lo uzakuba nzima kakhulu kulanyakenye ngakho kuyadingeka ukuthi uhulumende aphume lamaqhinga awokuthuthukisa impilo zabantu emakhaya.
UNkosikazi Beauty Dube isakhamuzi seGaranyemba uthi kusobala ukuthi uhulumende kaMongameli Emmerson Mnangagwa uyehluleka.
Amazwi akhe agcizelelwe nguMnu. Brighton Nare oweNtalale othi kuyamangalisa ukuthi uMongameli Mnangagwa uthethe ikhefu ngesikhathi umnotho welizwe ungamanga kahle.
Lanxa umongameli Mnangagwa ephethe esithi uzulu abekezele kusalungiswa umnotho wakuleli, inengi selilahle ithemba yekusasa engcono phansi kombuso wakhe.
Your browser doesn’t support HTML5
UAlbert Ncube Uyalandisa