Izifundo zabantwana abaqala ibanga lika Form 5 ziyaqala ngoMvulo ozayo njalo abazali baveza imizwa ehlukeneyo ngalokhu. Abanye bathi kulungile ukuthi abantwana bafunde kodwa abanye ngabathi lokhu kubafaka ebunzimeni ngoba imali zokubhadalela indleko zesikolo zingekho.
Isilinganiso sabafundi abaphumelele emihlolisweni ka form 4 ngomnyaka odluleyo, sikumatshumi phose amabili lanhlanu ekhulwini (24.8%) okuyisilinganiso esehle kakhulu kulesomnyaka ka 2019 samatshumi aphezu kwamathathu ekhulwini (31.6%).
Unkosikazi Getrude Tshuma umzali wakoBulawayo, uthi lokhu kulicebo elihle ukuthi abantwana baqalele ukufunda ukuze bengalahlekelwa yisikhathi ezifundweni zabo.
“Siyananzelela njengabazali ukuthi abantwana baphuthelwe yizifundo kumnyaka ophelileyo lokhu yikho okudale ukuthi bengaphumeleli Kuhle ezifundweni zabo. Mina ngibona kukuhle ukuthi bahle baqale ngoba ama results esephumile ukuthi bafunde Kuhle njalo loHulumende utshilo ukuthi bazabhadala ifees ngamalanga abawafundileyo lokhu lathi kuyasikhhuthaza njengabazali ukuthi sincedise abantwana ngokuphangisa ukuze bengaphuthelwa ezifundweni zabo.”
Unkosikazi Sheena Sibanda isakhamuzi saseMakokoba uthi ezikolo akukalungi konke ukuthi abantwana sebengaqala ukuthi bafunde.
“Njengabazali asithokozi nxa kuthiwa abantwana beA level bayaqalisa ukufunda on Monday ngoba as we speak ezikolo there is a lot of disorganization.Khathesi uyathola abantwana bagcwele indawo yonke there are still busy clearing amabhuku abo abanye abakathathi amarusults abo so amboni ukuthi bayabe sebeqedile by Monday baclear baphiwa amaslips abo bathenga ama uniforms babhadala abafees kusasekunengi okumele bakwenze ngabe bayabanika iweek or 2 before beqala izifundo zabo.”
Umnunzana Mkhokheli Ndlovu umzali ohlala eNkulumane yena ukhala ngokuthi kuzaba nzima ukubhadalela indleko zesikolo.
“Indaba yabo lower 6 leyi inzima kakhulu sesikhangela ukuthi ama results aphuzile ukuphuma zukuzuku sekuthiwa next week sekuthiwa abantwana ebahambe esikolo ilower 6 kambe singabazali siyabe sesiyithethe ngaphi imali sesikhangele ukuthi isimo sakhona sinjani.Ngabe kuthiwa babekezelile kwadlula iviki eyodwa ukwenzela ukuthi abadala balungiselele izinto zonke zinzima akulula ukuthi umuntu azihlanganise ngesikhathi esincane.”
Umnunzana Taungana Ndoro isikhulumeli sogatsha lwezemfundo uthi abafundi ababhale imihloliso nyakenye benze kuhle kakhulu, uma kukhangelwa ukuthi izikolo zivalwe okwesikhathi eside.
“Nxa sikhangele impumela yabafundi bomnyaka ophelileyo sibona benze kuhle uma sikhangela ukuthi umkhuhlane weCovid-19 wadala ukuba izikolo zivalwe okwesikhathi eside. Kuthi imbhadalo yesikolo eyabafundi abaqala uLower 6 kuviki ezayo kulendlela efakiweyo nguhulumende ukuthi isetshenziswe ukuze babhadale imali elingana lamalanga abazawahamba esikolo.”
Abogatsha lwezemfundo bethule umbiko olaya izikolo ukuthi azisavunyelwa ukubamba impumela yabafundi uma bengaqedanga ukubhadala inhlawulo zesikolo. Izikolo sezikhuthazwa ukuthi zizame amanye amacebo wokuthola inhlawulo kubafundi labazali ngendlela ezingasoze zivimbe abafundi ukuqhubekela phambili besiya kusibanga esilandelayo semfundo.
Your browser doesn’t support HTML5
Udaba lokuqala kwezifundo zikaForm 5 siluphiwa nguBathabile Masuku