UMongameli Emmerson Mnangagwa uthi uhulumende wakhe seyethule umthetho oxwayisa izizalwane zeZimbabwe ezifihle imali phandle kwelizwe ukuthi ziyiphendukise phakathi kwenyanga ezintathu ezilandelayo kungela kujeziswa.
Kodwa uthi abazakwehluleka ukwenza lokhu bazabotshwa.
Embikweni awethule ngoLwesibili, uMnangagwa uthe banengi abantu abafihle impahla lemali efika kuzigidi lezigidi phandle kwelizwe.
Ngakho-ke uxwayise abantu laba ukuthi baphendukise limali le phakathi kwenyanga ezintathu ezilandelayo kuqala usuku lwakuqala ngoMpalakazi kusiyafika ekupheleni kukaNhlolanja.
Abazakwenza lokhu kabasoze babotshwe njalo kabasoze babuzwe ukuthi babevele beyikhiphelani limali elizweni.
Kodwa abazakwehluleka ukulandela lumlayo, bazabotshwa bajeziswe, kutsho uMnangagwa. Amazwi akhe lawa amukelwe ngembono etshiyeneyo.
Olwela ukulondolozwa kwamalungelo oluntu njalo ehlaziya ezombusazwe, uMnu. Effie Dlela Ncube, uthe leli linyathelo elihle kakhulu elitshengisa ukuthi uMnangagwa ufuna ukwakha ilizwe.
Omunye njalo olwela amalungelo oluntu uMnu. Thomas Sithole uthe abantu abafihle imali ngaphandle kwelizwe bayaziwa. Uthe kumele bajeziswe.
Isakhamuzi sakoBulawayo, uMnu. Thokozani Nhlapho, uthe lelinyathelo lihle kodwa akumelanga kube yindlela yokubamba kumbe ukujezisa amalunga eZanu PF akucele leGeneration 40 lona ebelilwisana lelika Mnangagwa eleTeam Lacoste lingafuni ukuthi uMnangagwa abe ngumongameli welizwe.
UMnu. Bekezela Nyathi, oyisakhamuzi njalo sakoBulawayo, uthe leli linyathelo elihle.
Ngenxa kokusungulwa kwemali yohlobo lwama Bond Notes ngo2016, uzulu eZimbabwe ikakhulu abasebenza kuhulumende bebekhipha imali eZimbabwe besiyayifihla emabhanga angaphandle kwelizwe.
EleZimbabwe libhekane lokusilela kwemali njalo uzulu utshona endwendweni zamabhanga lapho aphiwa khona ingcosana nje ngelanga.
Your browser doesn’t support HTML5
Udaba Silethulelwa nguBathabile Masuku
Ukuhlaziya loludaba uNtungamili Nkomo uxoxe loqoqa inhlelo zebandla le MDC-T, uMnu. Abednico Bhebhe.
Your browser doesn’t support HTML5
Ingxoxo loMnu. Abednicho Bhebhe