Uzulu weZansi yeMaNdebeleni uthi labo abanqobileyo kukhetho sokumele bafeze izithembiso abazenza lapho bekhankasela usekelo kukhetho olenziwe ngeviki edluleyo ukuze kube lempilo engcono.
Inengi kulesisabelo lithi kuyadingakala ukuthi labo abazangena edale lephalamende basebenzele ukuthuthukisa impilo yezizalwane zakuleli kungela kubandlululana ngezombusazwe.
Inengi kulumhlubulo lithi selidubeke kwenela njalo silikhangelele ikusasa engcono elemisebenzi.
UNkosazana Elizabeth Masuku oweFilabusi uthi ukuswelakala kwemisebenzi sekudale ukuthi abatsha babe yizigebengu.
“Abantwana bethu bayahawula kakhulu esigabeni la njalo sokubenza baze babe yizigangi ngoba akulanto zokwenza.Kuke kube lemisebenzi bakithi ba invest izinto abantwabethu basuke emakhaya ngoba khonokho ukuthi akula investment eZimbabwe kwenza abantwabethu bakhulu ingani abakwazi okumele bakwenze.”
UNkosazana Josephine Majaha oweSitezi uthi ukhangelele inkokheli ezizalalela njalo zilungise indubo ezibhekane labantu.
“Khonokho okukhulunywa ephalamende akubuye bazositshela benga impose izinto zivela phezulu abaze thatha izinto kithi bazise phezulu ngoba yithi esibakhethileyo njalo abantu abalungiselwa indawo yithi, esibathumileyo yithi ngoba sifunani yithi esikhala ngokuthi bantu sicela liyesenzela lokhu.”
Osakhulayo uNatasha Tshuma oweGwanda uthi yena akalathemba lekusasa engcono njengoba kulokhu kubusa inkokheli ebevele zikhona phambilini lapho uzulu ethwele amagabha avuzayo.
“Mina angikhangelelanga lutho nxa kuzatshintsha sizakwamukela njalo ma kungatshintshanga kwamukelekile ngoba kudala sihlupheka so ukukhangelela ulutho endaweni ezinjalo uncina usiba disappointed.”
Ocubungula ngezombusazwe uMnu. Mlamuli Nkomo uthi abamabandla aphikisayo sokumele bazihlolisise.
“Impumela enje ibingakhangelelwanga kodwa njengoba isikhona sokumele iopposition layo izihlolisisi ukuthi ibone ukuthi kufanele iyenze njani in future.”
Ibandla leZanu PF linqobile kukhetho olusanda kuqhutshwa loba nje abomanyano weMDC Alliance besithi abayamukeli impumela ethi uMongamel Emmerson Mnangagwa oweZanu PF unqobile ngoba kube lobuqili abenzileyo encediswa ngaekomishini ebona ngezokhetho eyeZEC.
Your browser doesn’t support HTML5
Udaba lwezakamizi zeGwanda siluphiwa nguAlbert Ncube