Ukuthola usizo lokwelatshwa ezibhedlela kuqhubeka kusiba nzima kuzizalwane zeZimbabwe ezikweleBotswana, ikakhulu lezo ezingala maphepha okuhlala kumbe ukusebenza kulelozwe, noma nje uhulumende esithi abagulayo loba abalimeleyo kumele baphathiswe kungakhathalekile ukuthi bavela kuliphi ilizwe.
Abanye abeZimbabwe bakhala ngokungatholi usizo olupheleleyo uma beludinga ezibhedlela zakweleBotswana, besithi izisebenzi emthola mpilo zilobandlululo kwesinye isikhathi.
Esibhedlela esikhulu esePrincess Marina, esiseGaborone, abanye bathi babhekana lobunzima ukuthi bathole usizo lokwelatshwa ikakhulu uma bengelamaphepha okuba selizweni.
Ensukwini ezisanda kwedlula kulomunye ujaha odabuka eBinga, otshaywe yimota waphuza ukuthola usizo esibhedlela ngenxa yesimo sakhe samaphepha.
Ucine ebhubha esesibhedlela sePrincess Marina ngempelaviki. Izihlobo zibikwa zisithi azilamali yokuthwala isidumbu ukuthi siyobekwa eZimbabwe.
Omunye owe Zimbabwe uMnunzana Abraham Nkomo uthi usebuhlungwini ngemva kokuhlinzwa okungahambanga kahle khona esibhedlela sePrincess Marina.
Abemuli bathi uNkomo usekhitshiwe noma nje elokhe esebuhlungwini, ngemva kokuhlinzwa esiswini.
UNkosazana Sibongile Ncebe, onguye ogcine uNkomo, uchaza ngesimo sakhe.
“Uqale ukugula ngoZibandlela. Samhambisa esibhedlela seMarina, ngelanga lakuqala lelesibili abazange bamkhangele ukuthi uhlutshwa yini. Bazamnceda ngelanga lesithathu, lapho abathatha ama X-ray.”
Uthi ngemva kokuhlinzwa, kwasuka kwahamba nxele, ukuthungwa sekuqhaqhekile.
“Bathi ngemva kokumhlinza, ioperation yasuka ya wonakala. Ngababuza ukuthi manje kwenziwa njani, bathi akuthungeki. Sebemkhiphile sengilaye endlini, kulohlupho ngoba kumele ngimhambise insuku zonke ukuyageziswa.”
UNcebe uthi usethwele nzima ngoba engasebenzi kodwa kumele adingele isigulane amaphilisi njalo aye esibhedlela nsuku zonke. Lanxa angaze aye ekhaya uthi akaboni ezathola uncedo olungcono njengoba lezibhedlela ze Zimbabwe lazo zivele zingela ncedo.
Okunhlanganiso ye Zimbabwe Community in Botswana, umnunzana Cephas Tshuma, uthi kukhanya kusiba lobandlululo kwezempilakahle.
“Indaba lezi ziyahlupha ngoba ungakhangela udaba lukajaha weBinga, ungathola ukuthi akulanto ezakwenziwa. Abantu bokuza, yithi abeZimbabwe.”
UTshuma uqhubeka esithi sekuyisikhathi ukuthi ihofisi yommeli weZimbabwe ibone ukuthi iyakhulumela, ikakhulu abangalamaphepha, phezu kwendaba zempilakahle.
“Umthetho weBotswana uthi wonke umuntu kumele ayelatshwe kodwa ayisikho okwenzakalayo ezibhedlela. IEmbassy kumele ilukhangele udaba lolu. Abasizwe abangalama permits bathole amaphepha, ukuze bethole loncedo ezibhedlela.”
Ihofisi yommeli weZimbabwe kweleBotswana ithi ivame ukuthola imibiko yokuhlukuluzwa kwabanye, ikakhulu abangalamaphepha, njalo iyenza konke okusemandleni ukuthi ikhulumisane leziphathamandla zikahulumende weBotswana.
Ommela ihofisi yeZimbabwe eseGaborone, umnunzana Henry Mukonoweshuro uthi wonke umuntu, noma engelamaphepha kumbe elamaphepha, ulelungelo lokuthola usizo lokwelatshwa.
“Ungakhangela indaba ezinengi zabantu beZimbabwe abangaphathwa kahle ngabangalamaphepha. Kodwa akutsho ukuthi uma ungelamaphepha, awusela lungelo.”
EleZimbabwe lele Botswana asanda kuqhuba umhlangano wesine owe Bi-National Commission lapho okuthintwe indaba ezitshiyeneyo.
Ekhuluma lentathelizindaba emaphethelweni alumhlangano, uMongameli Mokgweetsi Masisi wakweleBotswana uthe ukungena kwabantu besebenzisa izithupha hatshi ingwalo zamaphasiphothi, kuzaphathisa ukuqeda indubo ezibhekane labahlala elizweni okungekho emthethweni.
SEE ALSO:
Udaba Esilwethulelwe NguMqondisi Dube