Izizalwane zeZimbabwe ezingelamaphepha okuhlala lokusebenza kwele South Africa zithi zithwele amagabha avuzayo ngakho zifisa uhulumende womanyano aziphe amaphepha ukuze ziphile zikhululekile.
AbeZimbabwe abangelancwadi ezisemthethweni zokuba kwele South Africa bathi bathwele amalahle ekhanda. Bathi ezindleleni nxa besiya emisebenzini kudingeka behambe becatshela amapholisa. Abanye bathi babotshwa umuntu esiya emsebenzini, kuthi nxa ungaswela imali yesivalamlomo uthole umsebenzi usuphelile.
Isizalwane seZimbabwe njalo engumkhokheli wenhlanganiso yeWomen Diaspora Association, uNkosazana Vuyani Hlazo, uthi loluhlupho luzwisa usizi kakhulu kubomama.
“Omama ma behamba la estradeni kunzima kakhulu ngoba bayabotshwa. Abanye batshiya abantwana abancane ezindlini. Abanye bayabe bengama bread winners. And kubanzima ma sekumele ukuthi baphume sekufuneka idocumentation. So, i-Immigration Department kufanele ukuthi idocumente abantu ngoba abantu ma sebekhona la eSouth Africa I believe ukuthi iministry kuyabe kufanele ukuthi ibone ukuthi umuntu wonke udocumented.“
UNkosazana Hlazo uthi omama inhlupho zamaphepha abahlangani lazo emigwaqweni kuphela.
“Ma bengaphathanga amaphepha abancediswa ma besiya kuhealthcare sector especially kakhulu omama abazithweleyo kubanzima. Utholukuthi abanye ma behambile laphana bayatshelwa ukuthi asikwazi ukukunikeza ibirth record ngoba awulamaphepha kodwa akusiyinto evunyelwayo. So, ziningi inkinga abahlangana lazo and bayabe bengakwazi lokuthi baye kubani.”
Owesilisa weZimbabwe ongathandanga ukuvezwa igama lakhe uthi okubakhathaza kakhulu yikuthi selokhu kwethulwa iviyo labancedisa ezokuphetha esabelweni seGauteng amaCrime Wardens abadume ngokuthi ngamaPanyaza ndawonye lamavolontiya, abeZimbabwe sebephendulwe umgodi wemali.
“Ukubopha abantu mina personally ngibona engathi akusikho kubopha. Yibutsotsi. Yikudizisa abantu nje ukuthi bethole imali. Abantu basebunzimeni become everytime ma usithinje esi stradeni utholenje bamile amavolonteers lamapholisa bafuna lezo mali. Abanye bayahamba nasepolice station but within 10 minutes bazabe sebephumile esefonelwe uMbedzi ukuthi ndoda woza lapha bengicela imali engaka nami ngiphume. So, I think it’s a business scam eyenziwa ngamapholisa.”
Umgcinisihlalo wenhlanganiso yeZimbabwe Progressive Foundation, abayichaza ngokuthi ilwela ukukhululeka okugcweleyo kweZimbabwe, uMnumnzana Lance Mlilo, uthi bakhangelele ukuthi umphathintambo omutsha kugatsha lwendaba zasekhaya uMnumnzana Leon Schreiba abe ngokuhlukileyo kakhulu kulalo obekhona obengakufihli ukuthi akabathandi abantu beZimbabwe.
“Uminister ozobe ekwazi ukuthi abantwana beZimbabwe beze la ngokuhlupheka. Beze la ngokwazi ukuthi labo bazozincedisa. Besela ngesimo esibaphushayo besuka ezweni lokuzalwa beze kuleli lokuhlupheka eliyi South Africa. Kuthi laba abakade belamapermit bathole amapermanent residency. Kuthi laba abanye laba abanye laba siyayenzele ukuthi kutholakale indlela yokuthi abantu bathole amaphepha ngokugcweleyo, lawo ma refugee papers.”
Kusenjalo, usikomitshi wamapholisa uGeneral Fannie Masemola ukhuthaza umphakathi ukuthi abike yonke inkohlakalo eyenziwa ngamapholisa.
Siyazi akhona amapholisa akwenzayo lokhu. Nxa Siyithola imibiko yalezi zenzo siqhuba upenyo sibabophe sibajezise.”
Kodwake uMasemola uyakuqinisekisa ukuthi kungumsebenzi wamapholisa ukubopha lokusa emthethwandaba labo abangelamaphepha okuba selizweni njalo le yinto abazahlala beyenza.