Kuwoza Friday Lamhlanje inkampani ye Usizo Promotions kanye leyeWise Guard Security Services sebesungule uhlelo lokuxasa abaculi beZimbabwe ngokubapha ithuba lokuncintisana emculweni besebethola umvuzo wemali yokuthuthukisa umculo wabo. UBenedict Nhlapho usipha loludaba eseJohannesburg kweleSouth Africa.
Bekungabizwa ozwayo eHibrow Theatre mhla ziku 3 kuMfumfu ntambama, ngesikhathi amaqembu ezomculo eqwaqwazana ehlelweni loxhaso oluze lenkampani ye Usizo Promotions ngokusebenza ndawonye leye Wise Guard Security Services.
Ngokokuqala embalini yabaculi beZimbabwe kweleSouth Africa ukuthola ithuba lokuncintisana besekusithi abanqobileyo baphiwe imivuzo. Akumangalisike ukuthi kungani abaculi bebethabe okukadwayi mhla edobhe ingidi kasamaKheyi efusini.
Umsunguli wenkampani yeUziso Promotions owaziwa ngelithi Tholakele kwezomculo, uthi ufikelwe ngumhlelo ebona inala yamathalenta itshabalala ngenxa yokuswela uxhaso.
Esinye isiphathamandla sale inkampani umnumnzama Teddy Ndlovu uthi kakula hlobo lomculi oluvalelwe phandle kwaloluxhaso.
Unkosikazi Nomalanga Moyo, umqondisi wenkampani yeWise Guard Security Services eyiyo epha uxhaso lwemali, uthi okwamhlaka 3 Mfumfu bekuyinzwisanje kuphela.
Kantike uthi mhlaka 6 Lwezi amabhulugwe azagcwalumoya kusubuke amazwane.
Obona ngokuqhutshwa kwenhlelo zalinkampani umnumnzana Zihlobo Ncube uthile yinto asebezayenzaa minyaka yonke.
Bathike abaculi dumo kweliphezulu kuye Umvelingqangi ngethamsanqa abavezele lona, besithike ngomlomo weZingolisi Zezulu, ngizakumbonga ngani uMesiya wami.
Your browser doesn’t support HTML5
Udaba Silethulelwa nguBennedict Nhlapho