Ele Zimbabwe lilahlekelwe kakhulu lonyaka ngokufa kwabaculi abalodumo phose abalitshumi labanye abakade bencedisana labo ukwethula ingoma ezilohlonzi bebulawa yimkhuhlane etshiyeneyo.
Lokhu kutshiye uzulu ethithibele njengoba abanye balaba baculi betshiye imuli zihlupheka ngenxa yokuswela imali.
Ababhubhileyo bagoqela uPrince Tendai Mupfurutsa otshone ngoLwesithathu, uCephas Mmashakada, uHilton Mambo lo Tongai Moyo.
Imuli ka Tongai ibikwa isidubeka okwamagama loba nje umhlabeleli lo wayesaziwa elizweni lonke ngengoma zakhe ezigijimisa igazi.
UPrince Tendai okade ephila impilo ephakame, abakibo babikwa belakho ukukhomba ngophakathi njengoba etshiye inotho ekhangelekayo.
Akwaziwa ukuba imuli ka Mashakada, uMambo kanye lamajaha eCool Night Band – uKhumulani Chaka, uKhumbulani Gibson Magaya kanye lo Clement Chinyama - ziphila njani kulandela ukutshona kwabo lonyaka.
Kuvamile ukuthi abahlabeleli bafe bengatshiyeli imuli zabo ilifa. Abaculi abanengi bakhala ngokuthi uzulu uthenga abesethengisa ingoma zabo okungekho emthethweni ngokuzibazela ama compact disc.
Ngaphandle kwalokho, abahlabeleli abanengi babikwa bengazibambanga empilweni okwenza ukuthi bafe imhlathi ingakabuzani amavuko.
Abahlabeleli abalodumo uSandra Ndebele lo Loveness Wesa bathi banengi abaculi abagulayo kodwa abangafuni ukuthi kwaziwe isimo sabo baze bafe. Bathi lokhu kwenza ukuthi bangatholi uncedo olufunekayo.
