Isigaba sebandla le Zanu PF eMashonaland East namuhla sibelomhlangano we Coordinating Committee sanquma ukuba umphathintambo wezomvikela, uMnu. Sydney Sekeramai lomphathintambo wezempilakahle, uMnu. David Parirenyatwa kumele basuswe kudale le Central Committee yebandla ngoba bacatshangelwa ukuthi basekela uNkosikazi Joice Mujru.
Abanye abaxotshiweyo kudale le Central Committee babalisa umsekeli kamphathintambo wezokulima, oMnu. Paddy Zhanda, Jericho Gotora, Zvikomborero Mangowo, Moreblessing Mushure lo David Kanjere. Lokhu kulandela isicebiso sika Mugabe asenze emhlanganweni we Congress ngoMgqibelo esithi isigaba seMashonaland east kumele senze olunye ukhetho lwenkokheli.
Ibandla le Zanu PF lavumelana ukuthi abatholakala besola umbuso kaMongameli Mugabe kumele baxotshwe ebandleni. Okwamanje abaxotshiweyo babili kuphela, oMnu. Jabulani Sibanda lo Rugare Gumbo kuthi abanengi bamiswa nje ukuba ngamalunga kodwa bazabuyela ngemva kwesikhathi.
IStudio Seven ixoxe lowalwa impi yenkululeko, uMnu. Max Mkandla ukuze sizwe imbono yakhe ngololudaba, ikakhulu ukuthi uMugabe engakhetha bani ukuthi amsekele.