Ukuvalwa kwezikolo elizweni phansi kweziqondiso zikahulumende zokuvala ilizwe emizameni yokuvimba ukuthelelanwa kwegcikwane leCovid 19, okwenziwe enyangeni ezimbili ezedluleyo, kutshiye ababalisi labafundi bekhathazekile ngoba kuze kube manje abakatholi ulwazi lokuthi izikolo elizweni zizovulwa nini.
Ezinye izikolo elizweni seziqalile ukusebenzisa ubulembu obe Internet, ukuqhuba izifundo ikakhulu emakholitshini emfundo yaphezulu kusetshenziswa imitshina yamacomputer.
Ingcwethi kwezemitshina yakulezinsuku eyeTechnology, abafundi kanye lababalisi, bakwamukele lokhu kodwa bathi, ayisibo bonke abanelisa ukuthola amacomputer njalo lokufinyelela ubulembu beInternet ikakhulu abaphuma emulini eziswelayo.
Enye yalezingcwethi, uNkosazana Thando Gwinji, olilunga lenhlanganiso yabasakhulayo eye Youth For Innovation Trust, uthi eleZimbabwe lingaqala ukusebenzisa lezinkundla ukuqhuba izifundo kuzabanzima ngoba abafundi abasemaphandleni ngeke bathole amathuba afanayo labasemadholobheni.
“Umango esilawo usese mude kakhulu ukuthi kutholakale ugetsi, imitshina lamagagasi emaphandleni. Ngakho nxa sifuna ukuthi i e-learning isebenze kumele siqale ukuphucula isimo esesemaphandleni,” kutsho uGwinji.
UNkosazana Thando Gwinji owenhlanganiso yeYouth For Innovation Trust
Ephatha udaba mayelana lokukhwela kwenani labantu abasebenzisa incingo ezilakho ukungena ku-internet elizweni, uGwinji uthi yebo lokho kuliqiniso kodwa enengi labantu elizweni bayasebenzisa lezincingo ukuxoxa lezihlobo kanye labangane besebenzisa inkundla zokuxhumana. Uphinde wathi ukuze umuntu azithole esebenzisa ubulembu beInternet ukufunda kulezinye izinto ezizafunakalayo ezingatholakale lula okugoqela amanye ama mobile applications.
“Ukuze sisebenzise i- internet for ukufunda lokufundisa abantwana besikolo kufuna ulwazi oluthe xaxa ngama applications athile ayenza ukuthi kube lula ukuthi abantwana bazwisise abakufundayo, njalo kufunakala imitshina engani isezinga eliphezulu ukuthi abantwana beyenelise ukugcina ingwalo,” kutsho uGwinji.
Your browser doesn’t support HTML5
Ingxoxo esiyenze lo Thando Gwinji