Inengi lababalisi eZansi yemaNdebeleni libikwa lingenelisanga ukuyafika ezikolo lamhlanje lapho zivulwa. Inhlanganiso zababalisi zibike ngeviki eyedlulileyo ukuthi ababalisi kabalamali yokugada besiya emsebenzini ngenxa yeholo eliphansi.
Ababalisi bafuna iholo labo libuyiselwe kulelo ababelithola ngomnyaka ka2018, lamadola eMelika, aphezu kwamakhulu amahlanu-US$540 andubana babuyele ezikolo.
Lanxa abafundi bevuke ekuseni lamhlanje belubhekisa esikolo abafikanga bafunda ngoba inengi lababalisi lingayanga emsebenzini besithi baswele imali.Ezikolweni ezinengi ikakhulu emaphandleni bekulabaphathi bezikolo kuphela okudale ukuthi abafundi betshone bezidlalela nje.
UNkosazana Siduduzile Masilela oweGwanda uthi abantwana bebeyekwejisa esikolo.
“Abantwana bahambile ezikolo njengoba izikolo zivuliwe kodwa ababalisi abanengi kabayanga yikho abantwana bahambile ezikolo babuya baziphendukela emakhaya okuyikuthi sifisa ukuthi uhulumende akulungisise abantwana bahambe ezikolo bayofunda ngokuphangisa ngoba vele abantwana basemuva ngenxa yeCovid nxa bengasafundi kuyasihlukuluza njengabazali.”
UNkosazana Lungile Masuku ongumzali uthi kubuhlungu ukuthi babhadale indleko zesikolo ngapha abantwana bengafundi.
“Abantwana bayaphenduka babuye ngikhaya bazohlala, wena mzali subhadele ifees wathenga amawunifomu konke walungiselela kuthi umntwana efika esikolo kuthwe akula mbalisi sebuyela endlini futhi ayehlala.Umbalisi ngeke simsole kodwa uhulumende laye kumele abone, anakekele ababalisi labo ukuze bafundise belomdladla.”
Umgcinisihlalo wenhlanganiso yababalisi eyeProgressive Teacher’s Union of Zimbabwe iPTUZ eZansi yemaNdebeleni uMnu Bigboy Nguluvhe uthi inengi lababalisi liyehlulekile ukuya ezikolo.
“Ngapha eBeitbridge District bangabe bekhona ababalisi abahambe ezikolo kodwa inengi aliyenelisanga ukuthi lihambe ezikolo, nxa sikhangele khonapha eBeitbridge inengi lababalisi belizihlalele emakhaya ngoba abalamali, abanengi labo abafundisa emakhaya kabahambanga.”
UNguluvhe uthi ngaphandle kokuthi baholiswe imali ethe xaxa ababalisi kabasoze benelisa ukubuyela emsebenzini.
“Kumele siphiwe imali elamandla ezadala ukuthi lathi sibhadalele indleko zethu, sibhadale amaschool fees,sibhadale amarent , siyakhe ,sithenge izigqoko njengababalisi sikhanye sibe lesithunzi emphakathini ngabe uhulumende uyasibisela khonaphana ku$540 esasiyihola.”
Umphathintambo wogatsha oluqhatsha izisebenzi zikahulumende olwePublic Service, Labour and Social Welfare uMnu Paul Mavima ubike ukuthi lanxa bezizwisisa inkinga ezibhekane lababalisi kodwa kumele babuyele ezikolo kusakhulunyiswana ngodaba lweholo.
Kusenjalo, izikolo ezinengi zalabo abafunda bebuyela emakhaya kazanelisanga ukuvula ngosuku lwakuqala lweFirst Term.
Lokhu kubangelwe yikuba ababalisi abanengi kabayanga emsebenzini bekhala ngokuthi abala mali eyenela ukugada lokubhadalela indleko zabo.
Abafundi ezikolweni ezinengi zikahulumende zalabo abahamba bephenduka emakhaya, ama day schools, baphindele emakhaya bengafundanga ngemva kokuba ababalisi bengabuyanga ukuzasebenza, kuthi labo abenelise ukubuya bebezihlalele bengafundisi.