Inengi selemukele ngembono etshiyeneyo umbiko owethulwe nguhulumende othi ababalisi abafundisa imfundo yaphansi ezikolo zama primary ezigabeni ze Matabeleland le Midlands abengenelisiyo ukukhuluma ulimi lweSiNdebele kabasoze basuswe kulezizikolo ngoba amatitshala enelisa ukukhuluma lolulimi emalutshwana kulezizigaba.
Umbiko lo uvezwe yisiphandamandla sogatsha lukahulumende olwezemfundo eMatabeleland South uMnu. Tumisang Thabela ekhuluma emkhosini obusesikolo se Tjehanga Primary School eBulilima.
Umphathintambo wezemfundo uMnu. Lazarus Gotora wayethe uhulumende uzadingisisa ngaloludaba, kulandela ukukhonona kwabazali, amabandla ezombusazwe, kanye lenhlanganiso ezilwela amalungelo oluntu ngaloludaba.
UMnu. Thabela uvumile ukuthi ngempela, ababalisi laba bengabe bebangela ukuthi abantwana bengaphumeleli ezifundweni zabo kodwa wathi ayikho eminye imizamo uhulumende angayenza ngoba ababalisi abakhuluma ulimi lwesiNdebele bayasilela kukanti abanye abafuni ukuyafundisa emaphandleni.
Wengezelele wathi isigaba seBeitbridge yiso esesiphumelele ukulungiselela izifundo zolimi lwe TshiVenda kugwalo oluhlela izifundo olwe curriculum.
Kusenjalo, iStudio 7 ixoxe loMnu. Jabulani Moyo, isakhamuzi seNsuza, yena othi isigaba sakhe sibhekane lohlupho olufanayo ngodaba lwendimi, njalo ngabe uhulumende uthatha amanyethelo okulungisisa loludaba.