Ukumiswa kwenhlanganiso ezizimeleyo ebeziphathisa uzulu weZimbabwe olambayo ngokudla kutshiye abantu abafika isigidi lengxenye, 1,5 million behlaselwe yindlala emangalisayo.
Abantu abangaba yizigidi ezinhlanu balakho ukulamba njalo bahlaselwe ngumkhuhlane obangelwa yikuswela ukudla okwakha umzimba owe malnutrition, nxa uhulumende engayekela ukuvumela inhlanganiso lezi ukuthi ziqhubeke ngomsebenzi wazo, kunyanga ezimbalwa ezizayo.
Lokhu kuvezwe ngohulumende bamazwe aphetsheya kugwalo olwethulwe lamuhla eHarare.
Amazwe la abalisa, iBritain America, Australia, Canada, Germany, Japan, Netherlands, Norway le Sweden. Amazwe la athi uhulumende kumele aphange avumele abenhlanganiso ezizimeleyo babele uzulu ukudla.
Athi njalo alokudana okukhulu ngoba uhulumende elokhu engakawaniki impendulo phezu kwesicelo sawo sikamhlaka 29 wenyanga edluleyo esokuthi avumele abenhlanganiso ezizimeleyo ukuthi zinike uzulu ukudla.
Amazwe la akhuthaze uhulumende ukuthi alandele isinqumo seMemorandum of Understanding phakathi kweZanu PF leMDC esokuthi uzulu abelwe ukudla, esithi uhulumende kumele avumele i United Nations ukuthi incedise abantu abahlaselwe ludlakela ababalekele imizi yabo.
Ingcwethi ecubungula ezombusazwe uMnu Walter Nsununguli Mbongolwane utshele uNtungamili Nkomo weStudio 7 ukuthi isizatho sokuthi inhlanganiso ezizimeleyo zilokhu zingakavunyelwa ukuqhubeka ngomsebenzi wazo yikuthi kulengxabangxoza kuhulumende, kubangelwa zinkulumo ezikhona phakathi kweMDC leZanu PF.