Ibandla leMDC lithi izidumbu zamalunga alo amane zitholakele izolo eChitungwiza lase Beatrice ngemva kokutshaywa ngabacatshangelwa ukuthi ngabasekeli beZanu PF abazibiza ngegama lokuthi Chipangano. Abane laba, abavela ndlu inye bathunjwe ngolweSibili emzini wabo edolobheni leChitungwiza. Abasekeli beZanu PF abacatshangelwa ukuthi yibo abenze lokhu bebefika amakhulu amathathu. Bengakathumbi abane laba babikwa beqale ngokutshisa indlu kakhansila walelidolobha, uMnu. Philimon Chipiyo.
Esinye isakhamuzi seChitungwiza, uMnu John Kudita esibone lokhu kwenzakala sithsele iStudio 7 ukuthi inengi labasekeli beZanu PF abacatshangelwa ukuthi yibo abenze lokhu bebekhanya ukuthi kabayisibo balumango.
Kunjalo nje, uyise kaMnumzana Lovemore Madhuku, umgcinisihlalo wenhlanganiso edinga ukulotshwa
kutsha kwesisekelo sombuso, iNational Constitutional Assembly-NCA, uthunjiwe izolo ngabasekeli beZanu PF emzini
wakhe eChipinge South. Sikhuluma nje akwaziwa ukuthi ungaphi. Lokhu kwenzakale
ngemva kokuba abasekeli beZanu PF betshise imizi edlula amatshumi amabili
lambili esigabeni esivela khona uMadhuku. UMadhuku ubikwa ubegcina izakhamuzi
ezibalekela udlakela kwezinye izigaba zalumango.
Iphephandaba le Herald lithi umgcinisihlalo wabasakhulayo kuZanu PF eZaka esigabeni seMasvingo, uMnu. Felix Masava ubulewe ngempelasonto ngabasekli beMDC. Isidumbu sika Masava sibikwa sitholakele singela ezinye izitho ezifana leminwe lamazwane.
Umgcinisihlalo wabasakhulayo kubandla leMDC eHighfields eHarare, uMnumzana Thabani Zikhali utshele uChris Gande weStudio 7 ukuthi ukutholakala kwezidumbu ezine zabasekeli bebandla labo kutshiye izakkhamuzi zeHarare sezithithibele.