Laloba ibandla leMDC elikhokhelwa nguMnu Morgan Tsvangirai belithe amalunga alo kasoze aphatheke ekuvulweni kwedale lePhalamende nguMongameli Mugabe, amalunga la abekhona emkhosini walamhlanje ndawonye laweZanu PF kanye laweMDC ekhokhelwa nguMnu Arthur Mutambara.
Kodwa amalunga la atshengise ukungamhloniphi uMugabe ngokumhoza ngesikhathi engena kulelidale lalapho sesethula amazwi akhe evula lelidale okusemthethweni.
UMongameli Mugabe ngokwakhe ubikwa engazange efisele amhlophe umlawuli wedale omutsha uMnu Lovemore Moyo yena okhethwe izolo. UMoyo ngumgcinisihlalo weMDC ekhokhelwa nguMnu Morgan Tsvangirai.
Engena emnyango wedale lePhalamende uMugabe, amalunga eMDC abikwa engazange asukume emhlonipha. Lokhu kwenziwe ngamalunga eZanu PF kuphela.
Emazwini akhe, uMugabe uhlabele ingoma yakhe yemvama, esola amazwe afana leBritain kanye leAmerica esithi yiwo abangela udubo olukhona elizweni. Usole udaba lwezijeziso zenotho, wancoma imizamo kaMongameli Thabo Mbeki yokuletha ukukhulumisana phakathi kweMDC leZanu PF esithi ulethemba kuzakuba lokuvumelana ngesikhatshana esilandelayo.
Esethula amazwi la abeMDC bamhoze okomuntu oyangise kakhulu emphakathini. Phandle kwedale abasekeli balelibandla labo babikwa bebehlabela ingoma besola iZanu PF, kubika intatheli yethu uThomas Chiripasi.
UChiripasi ubika njalo ukuthi kulamalunga ePhalamende aweMDC amathathu abotshiweyo ngemva kokuvulwa kwedale esetheswa icala lokubangela udlakela elizweni.
Kusenjalo ibandla leMDC lithi laloba amalunga alo ehambile edaleni lePhalamende lamuhla, kalimnanzi uMugabe njengoMongameli njalo kalisoze lafa lamnanza.
Ilunga lephalamende lalelibandla uMnu Felix Magalela Mafa Sibanda uchasisele uNtungamili Nkomo weStudio 7 ukuthi kungani behambile ephalamende bona bebekubeke sobala izolo ukuthi kabasoze bahambe.