Icele leMDC elikhokhelwa nguMnu Morgan Tsvangirai lithi selibuyelile ngokugcweleyo kuhulumende womanyano.
UTsvangirai wazise ngolweSine ephuma emhlanganweni weSadc Troika eMozambique ukuthi ibandla lakhe selibuyelile kuCabinet laku Council of Ministers kulandela inkuthazo yeTroika.
Ibandla
likaTsvangirai liphume kuCabinet kumaviki amathathu edluleyo lisithi lifuna
uMongameli Robert Mugabe elungisise konke okuhluphayo andubana liphindele.
Embikweni ewethule ngemva komhlangano wayo, iSadc Troika ikhuthaze inkokheli yeMDC leyeZanu PF ukuthi iyekhulumisana kulungisiswe konke okuhluphayo.
ISadc Troika ikhuthaze ukuthi izinqumo zayo ezethule ngoZibandlela mhlaka 27 ngodaba lweZimbabwe kumele zilandelwe ngokugcweleyo.
Izinqumo lezi zigoqela udaba lwaboMnu Gideon Gono lo Johannes Tomana okumele luhluzwe nxa kuyikuthi bayasuswa ezikhundleni basuswe.
ISadc Troika ithi njalo iZanu PF leMDC kumele zibe sezikhuluumisene kabanzi ngokuhluphayo kumalanga angamatshumi amathathu alandelayo.
Isiphathamandla seMDC kaTsvangirai uMnu Sam Sipepa Nkomo uthi ukubuyela kwebandla lakhe kuhulumende lo kutshengisa ukuthi lizinikele ukubona kusiba lentuthuko elizweni.
Ingcwethi kwezombusazwe uMnu Mlamuli Nkomo utshele uNtungamili Nkomo weStudio 7 ukuthi seliphelelwe ngamaqhinga ibandla leMDC yikho nje selibuyelile kuhulumende uMugabe engakalungisisi izikhalazo zalo.