Ingwethi kwezemfundo zithi uzulu weZimbabwe kumele abambane emizameni yokuvuselela ezemfundo, zona ekade zabhidlika elizweni.
Ingxaki ugatsha lwezemfundo olubhekane lazo, zigoqela ukusilela kwengwalo zokubala ezikolo, udaba lweholo lababalisi eliphansi, ukudilika
kwezinye izikolo ikakhulu emaphandleni, ukusilela kwezindlu zababalisi kanye lezokufundela.
Abantwana abanengi abaqhuba izifundo ze"O" le "A" Levels behlulekile lonyaka ukubhadala imali zokuthi balobe imihloliso, njalo abazali bathi bathwaliswe nzima zimali zama School fees.
Ingcwethi kwezemfundo uMnu Dennis Sinyolo, yena osebenze kakhulu kuhlangothi lwezemfundo engunobhala jikelele wenhlanganiso yababalisi, iZimbabwe Teachers Association, osesebenzela iEducation International ngomunye wabantu abakhuthaza ukuvuselelwa kwezemfundo.
USinyolo utshele uBrenda Moyo weStudio 7 ukuthi ukuze ezemfundo zivuselelwe elizweni, kuqakathekile ukuthi uhulumende abe lohlelo olucacileyo, iEducation Plan ngesingisi.