Umkhokheli welinye lamacele eMDC uMnu Morgan Tsvangirai ukhokhele abaphathintambo bebandla lakhe ngolweSibili kusinqumo sabo sokungaphatheki kunhlelo zedale leCabinet leCouncil of Ministers.
Icele likaTsvangirai kaliphathekanga kuCabinet njalo ngeviki edluleyo kulandela ukwazisa kwalo ukuthi kalisoze libe lisaphatheka kuCabinet kanye leCouncil of Ministers kuze kulungisiswe konke okuhluphayo kuhulumende womanyano.
Umsekeli wesikhulumeli seZanu PF uMnu Ephraim Masawi usole kakhulu iMDC kaTsvangirai ngenyathelo lelo. UMongameli Mugabe yena uqhube umhlangano weCabinet njengemvama labaphathintambo bebandla lakhe kanye labeMDC ekhokhelwa nguMnu Arthur Mutambara.
UMugabe uhlangane ngoMvulo loMnu Mutambara
loTsvangirai emizameni yokulungisisa okuhluphayo kodwa behluleka ukuvumelana.
UMongameli Mugabe ubikwa etshele uTsvangirai loMutambara emhlanganweni lo ukuthi nxa befuna ukuthi afungise osibalukhulu bezabelo abavela kumabandla abo, kumele baqale batshele amazwe afana leMelika ukuthi esule izijeziso njalo bevale imisakazo efana leStudio 7.
Isikhulumeli seMDC kaTsvangirai, uMnu Nelson Chamisa utshele intathelizindaba eHarare ukuthi sebekhangelele ukuthi iSadc ingenele ngokuphangisa ilungisise okuhluphayo, esithi ingehluleka, ibandla lakhe lifuna kwenziwe ukhetho olukhululekileyo.
ISadc Troika izathumela iqula ngoLwesine eHarare ukuyacubungula indlela uhulumende womanyano lo asebenza ngayo.
UTsvangirai yena ubikwa eqhube umhlangano labameli benhlanganiso ezizimele zodwa ngoLwesibili ebacela ukuthi basekele ibandla lakhe ekubandezeleni iZanu PF ukuthi ilandele iziqondiso zeGlobal Political Agreement.
Abaphathintambo beMDC kaTsvangirai bona babikwa benze owabo umhlangano eHarvest House bekhulumisana ngehlelo zikahulumende, kutsho uMnu Gorden Moyo, yena osebenzela ewofisini kaMnu Tsvangirai.
Ukuhlaziya ingxabangxoza ekhona kuhulumende sixhume ingcwethi ecubungula ezombusazwe uMnu Mandlankosi Gatsheni yena otshele uNtungamili Nkomo weStudio 7 ukuthi nxa uMugabe efuna ukuthi izijeziso zesulwe, kumele elandele iziqondiso zeGlobal Political Agreement.