I Zimbabwe imanyane lamanye amazwe awezwekazi le Africa ekunanzeni ilanga lokulondolozwa kwamalungelo abantu, i Africa Human Rights Day embuthanweni obuse Harare Gardens, ngolweSithathu.
Ilanga le Africa Human Rights Day linanzwa minyaka yonke mhlaka 21 October kulandela isivumelwano se African Charter esilotshwa ngamazwe awezwekazi le Africa ngomnyaka ka 1986 kugoqela lelizwe le zimbabwe. Umuthano wangolweSithathu ungenwe ngabantu abedlula abangamakhulu amahlanu abenelise ukufola ezitaladeni ze harare bephelekezelwa ngamapolisa njalo betshayelwa amacaco liqembu le Prisons Band;
Amalunga enhlanganiso ye Zimbabwe Human Rights NGO Forum , amanyene lawe Zimbabwe Human Rights Association, i-ZIMRIGHTS, afola e Harare enanza ilanga leli langa.
Inhlanganiso lezi zithi langa leli liqakathekile ngoba linanzwa nje kulandela ukububjwa kukahulumende womanyano, osokulethe ukuthula kancane elizweni, kanye lethuba lokuthi kwenziwe imizamo yokuloba isisekelo esitsha sombuso, okuyiso esiyinqaba ekulondolozweni kwelungelo loluntu.
UMnu. Clemence Moyo,ilunga le ZIMRIGHTS, utshele uSithandekile Mhlanga we Studio 7 ukuthi lanxa umahluko usubonakala kundlela amalungelo oluntu ananzwa ngawo elizweni, kunengi okulokhu kufanele kulingiswe.