Umkhokheli welinye lamacele eMDC njalo eyinhloko kahulumende uMnu Morgan Tsvangirai uthi ibandla lakhe kalisoze libe lisaphatheka kunhlelo zedale labaphathintambo, icabinet uMongameli Robert Mugabe aze avume ukulungisisa konke okuhluphayo kuhulumende womanyano.
Ekhuluma lentathelizindaba ngoLwesihlanu uTsvangirai
uthe ibandla lakhe likhathazeke kakhulu ngendlela eliphathwa ngayo yiZanu PF kuhulumende
womanyano, okugoqela ukubotshwa kukaMnu Roy Bennett lokungagcwaliswa kwesivumelwano seGlobal Political Agreement nguMugabe.
Ngalokhu uTsvangirai uthe ibandla lakhe seliphuma kucabinet kanye lakuCouncil of Ministers. Umsekeli wesikhulumeli secele leMDC elikhokhelwa nguMnu Arthur Mutambara, uMnu Renson Gasela uthi ibandla lakhe khona lizahlala phansi likhulumisane ngenyathelo eselithethwe licele likaTsvangirai leli.
Kodwa isiphathamandla seZanu PF uMnu Joram Gumbo usole kakhulu inyathelo leli esithi yibuwula obenziwa libandla likaTsvangirai, okungamazwi agcizelelwe yingcwethi ecubungula ezombusazwe uMnu Brilliant Mhlanga.