Umhlangano wokuzama ukulungisisa okulokhu kuhlupha kuhulumende womanyano, obumele ube khona ngoMvulo phakathi kukaMongameli Robert Mugabe, uMnu Morgan Tsvangirai kanye loMnu Arthur Mutambara awusaqhutshwanga ngoba uMongameli Mugabe engekho elizweni.
UMongameli Mugabe use Lybia emhlangweni weAfrican Union. Umgcinisihlalo weSADC uMnu Jacob Zuma obese Harare ngeviki edluleyo uxwayise abathathu laba ukuthi balungisise okulokhu kuhlupha phakathi kweMDC leZanu PF umhlangano omkhulu weSADC ungakenziwa.
Umhlangano lo uzakwenzelwa eDRC mhlaka 7 lo mhlaka 8 ngeviki ezayo. Amabandla la alokhu edonselana phezu kodaba lukasibalukhulu webhanga elikhulu lelilzwe uMnu Gideon Gono legqwetha likahulumende uMnu Johannes Tomana.
Izanu PF ibikwa njalo sisala ukuthi osibalukhulu bezabelo abe MDC bafungiswe baqalise umsebenzi. Inhlanganiso ekhankasela ukulondolozwa kwelungelo loluntu emhlabeni jikelele i Human Rights Watch yethule umbiko ngoMvulo isola kakhulu uhulumende weZimbabwe isithi uqhubeka esephula ilungelo loluntu.
Inhlanganiso le ikhuthaze njalo iSADC ukuthi ibambe uMongameli Mugabe ngamandla ukuthi avume ukulungisisa okusele kulenga kusivumelwano sokubumbwa uhulumende womanyano.
Ezinye indaba zeStudio 7...