Uhulumende seyazise ngokufa komunye wabasekeli bakaMongameli Robert Mugabe, uMnu Joseph Msika. UMnu Msika ubeseleminyaka engamatshumi ayithoba minwe mibili lanhlanu, 85.
Utshiye uNkosikazi wakhe labantwana abathathu. UMugabe wazise isizwe ukuthi uMnu Msika ebhubhele esibhedlela seWest End ngoLwesithathu ekuseni.
Kodwa abazi ngokwenzakalayo bazise lumsakazo ukuthi uMsika ubhubhe ngoLwesibili emini.
Akukazakali ukuthi uMsika udliwe yini, kodwa ubesegule okwesikhathi eside.
Ubikwa ezabekwa ngoMvulo emathuneni eNational Heroes Acre eHarare kulandela ukunikwa inhlonipho yokuba liqhawe lesizwe lidale leZanu PF politburo ngoLwesithathu.
UMsika uzalelwe eChiweshe, emangweni weMashonaland Central ngo 1923 kwathi ekukhuleni kwakhe wayahlala koBulawayo lapho asebenza khona andubana angene kwezombusazwe.
UMusika usebenze lamabandla afana leAfrican National Congress (ANC) wangena laku Zapu, yona eyayikhokhelwa ngumuyi uMnu Joshua Nkomo. UMsika ngomunye wamaqhawe esizwe alwa impi yenkululeko ekuZapu.
Uthethe isikhundla sokuba ngumsekeli kaMugabe emele iZapu ngo 1999 kulandela ukufa kuka Joshua Nkomo.
Omunye wabasebenze loMsika kuZapu, uMnu Dumiso Dabengwa uchaze uMsika njengomuntu obelesibindi engesabi lokukhuza uMongameli Mugabe lapho ephambanisa.
UMnu Sam Sipepa Nkomo laye ngomunye wabantu abasebenze loMnu Msika kubandla leZapu ngesikhathi somzabalazo wempi kazibuse njalo uyisiphathamandla secele leMDC elikhokhelwa nguMnu Morgan Tsvangirai.
UNkomo uthi ukuswelakala kukamsika yikulahlekelwa kukazullu weZimbabwe jikelele. Umbuzo osusemilonyeni yabanengi ngowokuthi "njengoba uJMsika seziphumulele, ngubani ozakhetha isikhundla sakhe?"
Inengi lithi ozathatha isikhundla lesi kumele evele kubandla leZapu, lona ebelimelwa nguMsika kulandela isivumelwano sokubambanisa i Zapu le Zanu ngo 1987.
Ingcwethi ecubungula ezombusazwe uMnu George Mkhwanazi uthi umgcinisihlalo weZanu PF uMnu John Nkomo nguye olakho ukuthatha lesi sikhundla.
UMnu Joshua Mhambi laye oyingcwethi ecubungula ezombusazwe uthi uMsika ubengumuntu olesinenke, olesibindi njalio osebenze gadalala ukuze iZimbabwe ithole uzibuse.