Izizalwane zakwamanye amazwe ezedlula ikhulu esabelweni seMpumalanga kwele South Africa sezibaleke zayacatsha enkambeni yamapholisa eBalfour. Lokhu kulandela ukuhlaselwa kwabakwamanye amazwe yizakhamizi abezikhalaza ngokuthi uhulumende uyehluleka ukuzinakakela.
Isimo siya sishuba sisiya phambili ngesikhathi uquhaha lwezizalwane zakuleli luqhanqalaza ezidaladeni lufuna izindlu, imisebenzi, amanzi, amagetsi, ezempilakahle, imisebenzi leholo elithe xaxa. Sekulezehlakalo ezilodlakela ezinengi esezibonakele emavikini ambalwa edluleyo. Elokitshini leDiepsloot lakwezinye indawo abebetshengisela batshise izindlu, imota, ikilinika, kanye lendlu yezingwalo.
Ensukwini ezedluleyo abangela misebenzi bangene bazitika ezitolo ezinkulu bethi uhulumende akabanikeze imisebenzi. Ukutshengisela okufanayo esabelweni seMpumalanga kukhanye sekubhekiswe kwabakwamanye amazwe abetheswa umlandu wokuminya abakuleli enhlelweni zikahulumende eziphiwa kungela mbadalo.