UMongameli Robert Mugabe ubikwa sevumelene lenhloko kahulumende uMnu Morgan Tsvangirai kanye lomsekeli wakhe uMnu Arthur Mutambara kokunye okusele kulenga emoyeni ekubunjweni kohulumende womanyano.
Abazi ngokwenzakalayo bathi abathathu laba bavumelene emhlanganweni wabo ngoMvulo ukuthi ugatsha lwe National Security Council kumele luqale ukuhlangana kuqala nje ngoLwesine. Bathi njalo kube lokuvumelana phezu kokuthi imithetho ephathelane lokwethulwa kwemibiko efana labo AIPPA iguqulwe.
Kodwa abazi ngokwenzakalayo laba bathi uMongameli Mugabe ulokhu esala ukuthi usibalukhulu weReserve Bank of Zimbabwe, uMnu Gideon Gono lomtshutshisi omkhulu kahulumende uMnu Johannes Tomana basuswe ezikhundleni zabo.
Idala leCabinet lona lihlangene ngoLwesibili kodwa uMugabe, uTsvangirai kanye loMutambara babikwa bengazisanga idale leli njengokwethembisa kwabo ukuthi kahle-kahle into ezilokhu zihlupha kuhulumende lezi zizaze zilungisiswe nini.
Iziphathamandla kucele leMDC elikhokhelwa nguMnu Tsvangirai zitshele iStudio 7 ukuthi kulokufuthelana okukhulu kulelibandla amalunga ekhonona ngento ezilokhu zilenga lezi.
Ingcwethi ecubungula ezombusazwe uMnu Briliant Mhlanga uthi amalunga eMDC la kumele esekele uTsvangirai emizameni yakhe yokukhulumisana loMugabe, hatshi ukumbandezela.