Inhloko kahulumende uMnu Morgan Tsvangirai wazise ngoLwesine ukuthi sevumelane lomsekeli wakhe uMnu Arthur Mutambara kanye loMongameli Robert Mugabe phezu kwezinye zezinto ezisele zilenga ekubunjweni kukahulumende womanyano.
Ekhuluma emhlanganweni lentathelizindaba eHarare uTsvangirai wazise ukuthi ukususwa esikhundleni kukasibalukhulu webhanga elikhulu lelizwe uMnu Gideon Gono legqweatha elikhulu likahulumende uMnu Johaness Tomana yikho okulokhu kuhlupha. Ngalokhu uthi sebebize iSadc leAU ukuthi zingenele.
Uveze njalo ukuthi kubosibalukhulu, ibandla lakhe lizathola abahlanu, iZanu PF abane kuthi icele leMDC elikhokhelwa nguMutambara lizathola usibalukhulu oyedwa. Uthe njalo okwamanje kulezikhundla ezinhlanu ezabameli beZimbabwe kwamanye amazwe; ngalokhu, ibandla lakhe lizathola izikhundla ezine kuthi icele likaMutambara lithole esisodwa.
Ezinye izikhundla zizakwabiwa nxa kungavuleka isikhundla. UTsvangirai uveze njalo ukuthi bavumelene ukuthi uMnu Roy Bennett agcotshwe ukuqala umsebenzi njengomsekeli kamphathintambo obona ngezokulima ngokuphangisa.
Ingcwethi ecubungula ezombusazwe uMnu Mlamuli Nkomo uthi kuyajabulisa ngempela ukuthi sokube lokuvumelana kwezinye zezinto ebezihlupha kuhulumende womanyano, kodwa uthi kuyadanisa ukuthi kusalokudonselana phezu kodaba luka Gono lo Tomana.
Kunjalo nje, uSithandekile Mhlanga we studio 7 uxoxe lo Alderman Charles Mpofu wako Bulawayo endawonye lo Mnu. Busani Ncube, ingcwethi ecubungula ezombusazwe, ukuze sizwe imbono yabo ngaloludaba.
UAlderman Mpofu usungule lingxoxo ngokuchasisa ukuthi kungani kuqakathekile ukuthi isikhundla sika Tomana lesika Gono ngabe yizo ezivunyelwane kuqala.