Icele le MDC elikhokhelwa nguMnu. Arthur Mutambara lokhu
ligcizelela ukuthi udaba lokuthi umsekeli kamkhokheli walo, uMnu. Gibson Sibanda
aqhubeke engumpathintambo obona ngokwenzakala ehofisini ka Mutambara lanxa
engelasihlalo ephalamende luzalungiswa yinkokheli kahulumende womanyano,
njengezinye nje izinto ezilokhu zisele zingakalungiswa kuluhulumende phansi
kwesivumelwano se Global Political Agreement.
U Sibanda, othathelwe isihlalo sakhe sokumela iNkulumane edale lephalamende nguMnu. Thamsanqa Mahlangu wecele le MDC elikhokhelwa nguMnu. Morgan Tsvangirai kukhetho olwedluleyo, bekufanele abe esethole esinye isihlalo kulelidale ngokutshona kwelanga ngolweSibili, ngoba inyanga ezintathu sezenele lokhu wabekwa ukuba ngomunye wabaphathintambo bakahulumende.
Umthetho weZimbabwe uthi umphathintambo kahulumende kufanele abe ngokhethwe ukuba lilunga ledale lephalamende, nxa kungenjalo, adingelwe isihlalo kulelidale kungakapheli inyanga ezintathu.