Umqondisi wenhlanganiso yeZimbabwe Peace Project uNkosazana Jestina Mukoko labasekeli beMDC ababotshwe ngoLwesibili bajikelwa entolongweni kulandela isinqumo sikamantshi esokuthi babuyiselwe ezandleni zomthetho bakhululwe ngoLwesithathu.
Kodwa kulabathathu abathi uMnu Ghandi Mudzingwa, Anderson Manyere kanye loMnu Kisimusi Dhlamini abalokhu besezandleni zamapholisa. Abathathu laba babikwa belindwe ngamapholisa ezibhedlela lapho abelatshwa khona eHarare.
UMongameli Mugabe ubikwa enguye olaye ukuthi abantu laba bakhululwe kulandela ukuhlaselwa kwakhe lenhloko kahulumende uMnu Morgan Tsvangirai kanye lomsekeli wakhe uMnu Arthr Mutambara emhlanganweni ababe lawo ngoLwesibili bekhulumisana ngezinto ezilokhu zilokudonselana kuhulumende womanyano.
Laloba igqwetha elikhulu likahulumende uMnu Johannes Thomana ekulandule lokhu kungxoxo yakhe le Studio 7, abazi ngokwenzakalayo bathi uMutambara loTsvangirai yibo abaqonqosele kuMugabe ukuthi abantu laba bakhululwe, besithi ukubotshwa kwabo kufaka uhulumende engozini enkulu.
Umphathintambo obona ngokwenzakala ewofisini yehloko kahulumende, uMnu Gorden Moyo uthi uMugabe laye ubesemnyameni ngokubotshwa kwabantu laba, okuyinto ephikiswa zingcwethi ezicubungula ezombusazwe.
UMukoko labanye bakhe babotshwe besemthethwandaba belande icala abaletheswayo elokuqhuba imisebenzi yobuhlamuki ngenjongo yokugenqula uhulumende kaMongameli Mugabe.