Inhlanganiso ye World Food Program ithi isisehlisa inani lokudla ebiphathisa ngalo eZimbabwe ngesilinganiso esedlula amatshumi ayisithoba galombili ekhulwini. Linhlanganiso eyingatsha yomanyano wamazwe omhlaba, iUnited Nations ike yazisa ngomnyaka odluleyo ukuthi iyehluleka ukuthola imali yokuthenga uncedo lokudla olokuphathisa eleZimbabwe.
Linhlanganiso ibiphathisa izizalwane zeZimbabwe ezedlula izigidi eziyisikhombisa kumbe ingxenye yelizwe lonke. Ingcwethi kwezokulima njalo emela isigaba semangwe edaleni lephalamende, umnu. Edward Mkhosi utshele uChris Gande weStudio 7 ukuthi lanxa izulu line kuhle kundawana zonke zelizwe isivuno siphansi kakhulu okokuthi nxa inhlanganiso eziphathisa ngokudla azimelanga zisuke ngoba indlala ilokhu ibhahile.
Kunjalo nje, omela isigaba se insiza edaleni lephalamende engowecele leMDC elikhokhelwa nguMnu. Arthur Mutambara, uMnu. Siyabonga Malandu Ncube utshele uChris Gande weStudio 7 ukuthi mpela indlala ikhona lumnyaka yikho ke akumelanga inhlanganiso ye WFP isuke elizweni.