Umphathintambo wogatsha olubona ngokungena kwabantu kwele South Africa uNkosikazi Nosiviwe Ngqakula uthi ugatsha lwakhe selwethule isinqumo sokuthi izizalwane zonke zaseZimbabwe ezikwele South Africa ngaphandle kwemvumo zingasabotshwa loba ukuphindiselwa ekhaya.
Uthi amaZimbabwe la azanikezwa amaPermit esikhatshana okuhlala lokusebenza kwele South Africa.
Ekhuluma lentathelizindaba eJohannesburg, uNkosikazi Ngqakula uthi kubathethe isikhathi ukufinyelela kulesi sinqumo ngenxa yezinye inhlupho ezingahle zidaleke. Phansi kwalesi sinqumo izizalwane zeZimbabwe zonke ezingelamvumo yokuba kwele South Africa azisezukubotshwa loba ukubuyiselwa kwelikaMzilikazi.
Umphathintambo Ngqakula uthi bafinyelele kulesi sinqumo ngemva kokubona ukuthi ukubopha lokubuyisela amaZimbabwe emuva kakusizi ngoba baphenduka kungakapholi lamaseko. Umsekeli kamqondisi obona ngokungena kwabantu elizweni kulolugatsha uMnumnzana Jackson Mackay uthi amaZimbabwe azaphiwa amapermit enyanga eziyisithupha ezabe esengezwa kusiya ngokuguquka kwesimo somnotho eZimbabwe