Umphathintambo obona ngezemali uMnu Tendai Biti uthi uhulumende uzasebenzisa imali engange US$1 billion lonyaka ukuhlawulela inhlelo zakhe.
Esethula isikhwama semali yokuqhuba inhlelo zikahulumende lonyaka ngolweSithathu edaleni lephalamande uMnu Biti uthe uhulumende ubhekane lobunzima ekuqhubeni inhlelo zakhe kanye lokuhlawula izisebenzi ngoba engela mali.
UMnu Biti ukhuthaze
uhulumende womanyano ukuthi asebenze nzima avuselela umnotho. Oke waphatha
isikhundla sikamphathintambo wezemali kungakabunjwa uhulumende womanyano, uMnu Patrick Chinamasa wethule ibudget yeUS$1,9 billion ngoZibandlela,
kodwa uBiti wehlisile limali yaba yiUS$1
billion
kuphela.
UBiti uthi labo abahola imali ephansi kwe US$150.00 kabasoze babanjelwe umthelo. Uthi njalo ilizwe livame ukuthola imali engange US$140 million ngenyanga ebanjelwa uzulu, eyemithelo etshiyeyeno, kodwa uthi ngenyanga edluleyo ilizwe lithole i US$25 million kuphela, okutsho ukuthi kuzathatha isikhathi ukuthi umnotho uvuselelwe.
Ingcwethi ecubungula ezenotho uMnu Walter Nsununguli Mbongolwane uthi ibudget kaBiti le izasilela ngoba ilizwe lidinga imali enengi ukuqhuba inhlelo zalo. Sibuze uMnu Mbongolwane ukuthi pho kungani uBiti ehlisile limali kulokuthi ayikhuphule?