Abalimi abamhlophe asebesele emapulazini sebehlalela evalweni ngoba sokulabantu asebevuke ubhova abahamba bethatha amapulazi. Ukuthathwa kwamapulazi lokhu kuqonge kakhulu ngensuku zokubunjwa kukahulumende womanyano inengi elithi yikwephulwa kwesivumelwano sikahulumende lo.
Umkhokheli wenhlanganiso yeCommercial Farmers Union uMnumzana Trevor Gifford utshele iStudio 7 ukuthi sokuthethwe amapulazi edlula amakhulu amabili kusukela ngesikhathi kubunjwa uhulumende womanyano. Besekusele abalimi abamhlophe abangamakhulu amane kuphela elizweni.
Ingcwethi kwezokulima engumsekeli wesikhulumi secele leMDC elikhokhekhelwa nguMnumzana Arthur Mutambara uMnumzana Renson Gasela utshele uBrenda Moyo owe Sutdio 7 ukuthi ukuthathwa kutsha kwamapulazi lokhu kuzaphazamisa isivuno, lamalungiselelo okulima ingqoloyi.
Kunjalo nje unobhala jikelele wenhlanganiso emela izisebenzi zemapulazini ethiwa General Association of Plantation Workers Union of Zimbabwe –GAPWUZ, uNkosikazi Getrude Hambira uthi ukuthathwa kwamapulazi osokuqhamuke elizweni sokubangele ukulahlekelwa ngumsebenzi kuzisebenzi zemapulazini ezedlula inkulungwane.