Uhulumende seqalisile ukuholisa izisebenzi zakhe imali yeMelika, yokuziphathisa phezu kweholo ezivele zilithola ngemali yase Zimbabwe.
Ekhuluma lentathelizindaba eHarare umphathintambo obona ngezemali uMnu Tendai Biti uveze ngolweSithathu ukuthi phezu kweholo izisebenzi zikahulumende ezivele zilihola, uhulumende seqalisile ukuzipha ikhulu lamadollar eMelika US$100 ngasisebenzi.
UMnu Biti wazise ukuthi izisebenzi zikhulumende eziqale ukuthola limali ngamasotsha wona ahole izolo. Wengeze wathi ababalisi kanye lezinye jikelele izisebenzi zikahulumende bazathola ama allowances la kuqala ngolweSithathu.
Kodwa inhlanganiso emela izisebenzi elizweni, i Zimbabwe Congress of Trade Unions (ZCTU) ithi ama US$ 100 la kasoze ancede izisebenzi ngalutho. Sixhume umsekeli kanobhala jikelele walinhlanganiso uMnu Japhet Moyo yena othi uhulumende kumele anikeze izisebenzi zakhe iholo eliphepheleyo ngemali yakwamanye amazwe.
Ezinye indaba zeStudio 7...