UMnu Morgan Tsvangirai sekhuthaze ukumanyana kubandla lakhe njalo wakhuthaza ugatsha lwaleli bandla olweNational Council ukuthi luphume lezinqumo eziqakathekisa impilo lezifiso zikazulu lapho luhlangana ngolweSihlanu ihlaziya udaba lokuthi iMDC ingene kuhulumende womanyano leZanu PF kumbe hatshi.
Inkuthazo kaTsvangirai iza kulembiko yokudonselana okukhulu phakathi kwecele alikhokhelayo phezu kokuthi lingene kumbe lingangeni kuhulumende womanyano. Kubikwa kulequla kucele likaTsvangirai elikhokhelwa ngunobhala jikelele walo uMnu Tendai Biti elixabana loTsvangirai phezu kwesinqumo sakhe emhlanganweni weSadc ngoMvulo lapho azinikele khona ukungena kuhulumende wodlelwano.
Ekhuluma lentathelizindaba eHarare Airport evela eSouth Africa ngolwesiThathu, uTsvangirai uthe isinqumo esizaphuma kuNational Council sibalulekile kakhulu, ngalokhu amalunga ebandla lakhe kumele esiqakathekise. Imbiko kaTsvangirai ikhomba sobala ukuthi kulokungezwani kubandla lakhe njalo ikuveza sobala ukuthi ngempela usefuna ukungena kuhulumende leZanu PF.
Amazi ngokwenzakalayo bathi uMongameli Mugabe evumile emhlanganweni weSadc ukuthi uzazilungisisa izikhalazo zika Tsvangirai, kodwa oBiti labanye babikwa besithi izikhalazo zabo lezi kumele zilungisiswe kuqala ngoba kungela kuqiniseka ekuthini uMugabe uzagcwalisa zonke izethembiso zakhe iMDC ingavele ingene kuhulumende le.
Ekhuluma leStudio 7 umsekeli kaTsvangirai uNkosazana Thokozani Khupe ukulandule ukuthi kulokulwisana kubandla lakhe. Umbuzo
osemilonyeni yabanengi okwamanje ngothi kambe icele likaTsvangirai linganquma ukuthi lingangeni
kuhulumende wodlelwano lo emhlanganweni walo wangolweSihlanu, abecele leMDC elikhokhelwa
nguMnu Arthur Mutambara bazangena na?
Umsekeli wesikhulumi secele likaMutambara uMnu Renson Gasela uthi ngitsho, ibandla lakhe kalisoze lingene kuluhulumende leZanu PF. kwenzeke lokhu. Kunjalo nje umqondisi omkhulu ewofisini kaMongameli we South Africa uRev Frank Chikane, uthi amazwe wonke eSadc kanye lenkokheli yeZanu PF leye MDC bayavumelana ukuthi izinqumo ezethulwe yile inhlanganiso yiyo kuphela indlela engaqeda ingxabangxoza eseZimbabwe.