Inhlanganiso ye Physicians for Human Rights isikhuthaze inhlanganiso ye zizwe zomhlaba eye United Nations ukuthi kube yiyo elawula ezempilakahle esezilele ngogedla ezimbabwe ukuze kwenqatshelwe ukufa okubangelwa yikutshaphazwa kwelizwe ngumbuso kaMugabe.
Linhlanganiso yethulelele abezindaba eJohannesburg umbiko phezu komumo wezempilakahle esezibhidlikile ezimbabwe, yakhuthaza ukuthi iziphathamandla zombuso kamugabe zithonisiswe emthethwandaba wezizwe zomhlaba. Ubenedict Nhlapho usipha loludaba esejohannesburg kwele South Africa.
Kunjalo nje, inhlanganiso ebona ngezempilakahle emhlabeni jikelele eye World Health Organisation ithi inani labantu asebebulewe ngumkhuhlane wecholera lokhu waqalisayo selikhwele ledlula inkulungwane ezimbili- 2 024 lisuka ku 1 937 kumbiko ewethule izolo, okutshengisa ukuthi lokhu uqhela.
Umkhuhlane lo ubikwa usuqhele wafika esigabeni se Chamunangana e Beitbridge le Ngungumbane eMberengwa okokuqala.
UMnu. Enos Tshili, isiphathamandla secele le MDC elikhokhelwa nguMnu. Morgan Tsvangirai e Matabelelend South, utshele istudio 7 ukuthi inengi lenani labantu abafa emaphandleni eBeitbridge alaziwa ngoba indawo lezi zingafinyeleleki lula.