Ngokungena kumnyaka ka2009 lamuhla, abantu ababengi bathi bebefisa ukuthi ngabe bathi bekhangela umnyaka ka 2008, bethi selidume ledlula.
Kodwa bathi okudanisayo yikuthi kusobala ukuthi lizaduma njalo ngo2009 lengezelele ubunzima ababhekane labo. Selokhu udubo lweZimbabwe luqalileyo eminyakeni elitshumi eyedluleyo umnyaka ka2008 ukhanya ubenzima kakhulu ebantwini.
Obunye bobunzima obubhekane lozulu ngomnyaka esisanda kuwuqhiba bugoqela ukuqhamuka kodlakela olubi kulandela ukhetho lukanhlangula kwafa abantu abedlula amakhulu amabili, ikakhulu abasekeli beMDC lozulu nje makhaza.
Intengo yezinto iqhubeke iqonga njalo sikhuluma nje iloaf yesinkwa ithengwa ngamabillion amahlanu amadollar - $5 billion. Into ezimqoka empilweni kazulu ziqhubeke zisilela elizweni kuthi ezempilakahle lazo ziqhubeke zibhidlika, kulokusilela kwemithi ezibhedlela lohulumende esehluleka ukunikeza uzulu amanzi ahlanzekileyo.
Lokhu kubangele ukuqhamuka komkhuhlane wecholera wona osubulele abantu abedlula inkulungwane lengxenye-1, 608. Zonke lezi, zindubo uzulu weZimbabwe athi ukhangelele ukuthi zingaze zaba khona kumnyaka lo.
Ukuhlaziya udaba lolu sixhume umeli weNkayi edaleni lephalamende uMnu Abednico Bhebhe lengcwethi ecubungula ezombusazwe uMnu Brilliant Mhlanga. UMnu Mhlanga uthi inkokheli yezombusazwe kumele iqakathekise impilo kazulu lonyaka kulungisiswe indubo ezikhona.