Ele Australia seliqhelise izijeziso elazethulelwa
iziphathamandla zeZanu PF ngokwengeza ezinye njalo iziphathamandla zaleli bandla ezingamatshumi ayisikhombisa lanhlanu, 75
lamankampani amane alobudlelwano lohulumende kuluhlu lwalo lwezijeziso.
Leli lizwe lazise ngolweSithathu ukuthi lifuna njalo uMongameli Robert Mugabe asuke embusweni. Kumaviki amabili edluleyo umanyano we European Union (EU) lawo wengezelele izijeziso zawo kuZanu PF, wakhuthaza njalo uMugabe ukuthi asuke embusweni ngoba seyehlulekile ukubusa ngendlela eqondileyo.
Yena uMugabe ngokwakhe uthi kasoze alalele inkuthazo le, esithi abantu beZimbabwe yibo bodwa abalamandla okumsusa embusweni. Kungelani lezijeziso elizethule lamuhla eleAustralia lazise ukuthi lizakupha eleZimbabwe imali engange US$670 000 eyokuphathisa ekulwisaneni lomkhuhlane wecholera kanye lendlala.
Sokuleminyaka ethize iziphathamandla zikahulumende kaMugabe zethulelwe izijeziso ikakhulu ngamazwe angentshonalanga ezethesa umlandu wokuhlukuluza uzulu lokwephula ilungelo loluntu. Kodwa njengemvama, ingcwethi ecubungula ezombusazwe uMnu Mlamuli Nkomo, utshele uNtungamili Nkomo weStudio 7 ukuthi izijeziso lezi kazisoze ziphazamise uhulumende kaMugabe lakancane.