Idale lePan African Parliament (PAP) ngolweSine liqale ukuhlaziya udaba lweZimbabwe amalunga alo esola kakhulu ukudonselana okukhona phakathi kwebandla leZanu PF leMDC, phezu kodaba lwezikhundla, osokwenqabele ukubunjwa kukahulumende womanyano.
Leli dale eliqale ukuhlala, ngoMvulo kwele South Africa, lithi ukudonselana lokhu sokubangele ukuthi uzulu weZimbabwe jikelele aqhubeke ethwele nzima. Ngalokhu lithi iSadc kumele ithathe amanyathelo aqinileyo kulungisiswe udaba lweZimbabwe.
Idale leli lihlaziye njalo lasola indlela ukhetho lwerun-off oluqhutshwe ngayo ngoNhlangula.
Obona ngokwethulwa kwemibiko kuleli dale uMnu Khalid Dahab utshele iStudio 7 ukuthi idale leli lifuna uhulumende womanyano phakathi eZimbabwe abunjwe ngokuphangisa kuqedwe zonke indubo ilizwe elibhekane lazo.
Idale leli liqhubekela phambili lihlafuna indaba ezitshiyeneyo eziphatha izwekazi leAfrica, njalo lizaphuma lezinqumo phezu kodaba lweZimbabwe ngeviki ezayo ngolweSihlanu. Uhulumende weMelika yena izolo usole uMongameli Mugabe ngokungafuni ukwabelana izikhundla ezimqoka leMDC.
Intathelizindaba yethu, uBennedict Nhlapho ubika ukuthi uhulumende weSouth Africa lamuhla ukhuthaze inkokheli yeZanu PF leyeMDC ukuthi ikhulumisane ngokuphangisa ivumelane iSadc ingakaze ithathe amanyathelo alukhuni phezu kweZimbabwe.
Ngakolunye uhlangothi, umkhokheli welinye lamacele eMDC uMnu Morgan Tsvangirai lamuhla uhlangane lenkokheli yenhlanganiso ezizimeleyo eHarare, eyazisa ngokuhluphayo kudaba lokwabelana izikhundla leZanu PF.