Laloba uzulu weZimbabwe ekhangelele ukuthi umhlangano weSadc Troika, wona ozakwenzelwa eHarare ngoMvulo uphume lesisombululo phezu kombango wezikhundla phakathi kweZanu PF leMDC, iStudio 7 iyakuveza ukuthi umhlangano lo ulakho ukuba liphutha nje ungaphumi lalutho.
Abazi ngokwenzakalayo bathi kulamaqula kuZanu PF lakubandla leMDC elikhokhelwa nguMnu Morgan Tsvangirai angafuniyo ukuthi uhulumende womanyano phakathi kwamabandla la aphumelele abakufunayo yikuthi kwenziwe ukhetho olutsha.
IMDC kaTsvangirai izolo yazise ukuthi uMugabe engaqhubeka etshengisa ukungahloniphi inkokheli yayo, inkulumo zangoMvulo zilakho ukungaphumeleli.
Iphephandaba le Herald libika ukuthi umkhokheli wenhlanganiso
yabalwa impi yenkululeko njalo esekela iZanu PF eye Zimbabwe National Liberators' War Veterans Association, uMnu Jabulani Sibanda uthi inhlanganiso
yakhe ikhuthaza uMugabe ukuthi abumbe uhulumende ongelaTsvangirai phakathi.
Isiphathamandla seMDC kaTsvangirai uMnu Sam Sipepa Nkomo utshele uNtungamili Nkomo weStudio 7 ukuthi laloba uMugabe engaze ebumbe uhulumende ongelaMDC phakathi kasoze enelise ukulungisisa izinto elizweni.
Ngakwelinye icele, umkhokheli welinye lamacele eMDC uMnu Arthur Mutambara uthi uMugabe engalandela inkuthazo yabalwa impi yenkululeko eyokuthi abumbe uhulumende, ibandla lakhe kalisoze liphatheke kiwo.