Amacele womabili eMDC kanye lozulu jikelele, usesola uMongameli Robert Mugabe ngokuba lesidensi ekuthini ahlangane lenkokheli yeMDC babelane izikhundla zedale labampathintambo eleCabinet kubunjwe uhulumende omutsha ngokuphangisa.
UMongameli Mugabe ubemele ahlangane loMnumzana Arthur Mutambara loMnumzana Morgan Tsvangirai ngolweSibili kodwa lumhlangano awusabanga khona ngoba uMugabe exolisile esithi ulomhlangano wedale lebandla lakhe owePolitburo.
NgolweSithathu uMugabe ubelomhlangano webandla lakhe owe Central Committee, kuthi
ngolweSine angene umhlangano weNational Consultative Assembly, oweZanu PF.
Ngalokhu
umhlangano phakathi kwakhe lenkokheli yeMDC ubikwa ulakho ukuba khona
ngolweSihlanu kuthi idale labampathintambo likhangelelwe ukwaziswa ngempelaviki.
Abasiki bebunda bathi iziphathamandla zeZanu PF ezinengi, zona ezilakho
ukulahlekelwa ngumsebenzi phansi kohulumende omutsha, zidla amalahle zisithi
uMugabe uphambanise kakhulu ngokungena kuhulumende womanyano leMDC.
Abazi ngokwenzakalayo kumacele womabili eMDC batshele iStudio 7 ukuthi iziphathamandla zamacele la zisola uMugabe zisithi ukhanya sesiba lesidensi ekuthini ahlangane lenkokheli yamacele la kubunjwe uhulumende omutsha aqale ukulwisana lokubhidlika komnotho.
Umqondisi weCrisis in Zimbabwe Coalition uMnu Xolani Zitha utshele uNtungamili Nkomo weStudio 7 ukuthi ngempela uMugabe ukhanya sesiba madolo nzima, kodwa esithi lapha asekhona manje ngalesi sivumelwano akusamvumeli ukuthi abuyele muva.