Inhlanganiso ezizimeleyo, ikakhulu ezezinkonzo, ezingathathelwanga imvumo nguhulumende eyokuholisa abantu abaswelayo ukudla zithi azenelisi ukufinyelela inani elinengi labantu njengalokhu okwenziwa zinhlanganiso ezinkulu ezinjengabo World Food Programme labo World Vision.
Enye yalezinhlanganiso, i Churches in Bulawayo, ithi iholisa abantu abazinkulungwane ezingamatshumi amathathu lanhlanu (35 000) kuphela ukudla ngenyanga elizweni jikelele, lapho umuntu oyedwa ophiwa umumbu wesilinganiso se 10 kg, amafutha okuphekisa, indumba kanye lelambazi lempuphu.
Lokhu kwenzakala inhlanganiso ezinengi azazithathelwe imvumo yokupha abantu ukudla sezilungiselela ukusungula njalo imisebenzi yazo njalo ezinye zibikwa seziqalisile ukukwenza lokhu.
Isiphathamandla se Churches in Bulawayo, umfundisi Promise Manceda utshele uSithandekile Mhlanga we studio 7 ukuthi kusobala ukuthi inani labantu abadinga ukudla liphezulu kakhulu kulaleli abalisizayo, njalo kungathokozisa ukuthi inhlanganiso ezizimeleyo zonke ziphathisane.