Inkulumo phakathi kweZanuPF leMDC ziqhubekele phambili eHarare ngolweSithathu njalo uMongameli Mugabe uthe ephuma kulezinkulumo ntambama watshela intatheli ukuthi ukhangelele ukuthi inkulumo lezi zigqitshwe ngolweSine kulotshelwane phansi isivumelwano.
Abakhokheli bamacele womabili eMDC uMnu Morgan Tsvangirai loMnu Arthur Mutambara bona batshele intatheli ngoLweSibili ukuthi bebekhangelele ukuthi inkulumo lezi zigqitshwe ngolweSithathu.
Icele likaTsvangirai libikwa lethule kunkulumo ukuthi lifuna kubunjwe ugatsha oluzabizwa ngokuthi yi Council of State oluzaletha ndawonye uMongameli welizwe, abasekeli bakhe, inhloko kahulumende kanye labasekeli bakhe.
Lolu gatsha luzakuba luhlangana njalo nje luhlaziya indlela uhulumende aqhuba ngayo umsebenzi. UTsvangirai ubikwa njalo efuna ukuthi uMutambara anikwezwe izihlalo esisodwa kuphela ku Cabinet hatshi ezintathu.
Ugwalo olukhona luthi uMugabe kumele athole izihlalo ezingu 15, utsvangirai ezingu 13 kuthi uMutambara athole ezintathu. Kodwa uTsvangirai ubikwa esithi ezikaMutambara zinengi kakhulu, ngalokhu kumele anikwe esisodwa kuphela.
Ngalokhu, kubikwa kube lokukhulumisana kubi ngaloludaba phakathi kwequla likaMutambara izolo eliku nkulumo lelikaTsvangirai.
Kusenjalo ingcwethi ecubungula ezombusazwe uMnu Brilliant Mhlanga utshele uNtungamili nkomo weStudio 7 ukuthi ngokubona kwakhe inkokheli le kumele ivumelane ngokuphangisa kulungisiswe udaba lweZimbabwe.