ObenguMongameli weleZambia, uMnu Levy Mwanawasa, obhubhe mhlaka 19 ngenyanga edluleyo ubekwe ngolweSithathu esigodlweni sezwe lakhe, iLusaka.
UMwanawasa ubhubhe eseleminyaka engamatshumi amahlanu lathoba munwe munye, 59 ubekwe mhlaka 3 ngoMpandula obekulilanga lakhe lokuzalwa.
UMongameli Robert Mugabe lomkhokheli weMDC uMorgan Tsvangirai batshiye ukufuthelana okuphakathi kwabo babambana lenkokheli yamazwe eAfrica kanye lozulu weZambia jikelele ekuphelekezeleni umuyi.
Osanda nikezwa intambo zokuba ngumgcinisihlalo weSadc ebe ziphethwe ngumuyi, uMongameli Thabo Mbeki weSouth Africa ngomunye wabantu abachaze uMwanawasa njengomuntu obehlonipheka njalo osebenze gadalala ekuthuthukiseni impilo yabantu beZambia kanye labeAfrica jikelele.
Inkokheli yamazwe eAfrica, ikakhulu eyeSadc ibikhona kulumngcwabo. UMongameli Mugabe yena uchaze uMwanawasa njengomuntu obelesibindi.
Umuyi
ngomunye wabakhokheli beSadc abambalwa abatshengise ukungamesabi uMugabe
bephuma mgceke besola uhulumende wakhe.
UMwanawasa uke wachaza iZimbabwe njengomkhumbi ocwilayo elwandle, okuyinto ecunule uhulumende kaMugabe.
UMugabe ngokwakhe kanye loTsvangirai bakhangelelwe ukuhlanganiswa nguMongameli Mbeki ekupheleni kweviki kanye loMnu Arthur Mutambara owelinye lamacele eMDC, eHarare bekhulumisana ngodaba oluhluphayo, olokwabelana amandla.
Ingcwethi ecubungula ezombusazwe uMnu Brilliant Mhlanga uchasisele uNtungamili Nkomo oweStudio 7 ngokuthi yena ubemazi engumuntu onjani uMwanawasa.