Inkokheli yecele leMDC elikhokhelwa nguMnu Arthur Mutambara ihlezi ilandula ukuthi ilobudlelwano obuqinileyo lebandla leZanu PF, kodwa okwenzakale izolo ekufungisweni kwamalunga edale leSenate lelePhalamende kuveze sobala lobubudlelwano.
Okulempondo obekufihlwe esakeni kuphume egcekeni izolo ngemva kokubana ibandla leZanu PF livotele uMnu Paul Themba Nyathi ukuthi athathe isikhundla sokubangumlawuli wedale lePhalamende.
Kodwa amalunga edale lePhalamende akubandla likaMutambara avotela
uMnu Lovemore Moyo owecele leMDC elikhokhelwa nguMnu Morgan
Tsvangirai.
Inengi beselivele lizibuza ukuthi kungani icele likaMutambara lisekelane loMongameli Thabo Mbeki, ibandla LeZanu PF lenhlangansio ye SADC kunkulumo zokuqeda udubo lweZimbabwe, ezaletha ugwalo uTsvangirai ala ukulusayina.
Kodwa
ingcwethi kwezombusazwe zisola inkokheli yebandla likaMutambara ngokufuna
ukudlelana lebandla leZanu PF yona esiqede iminyaka leminyaka ilwisana lombuso
kaMugabe.
UBrenda Moyo weStudio7 ukhulume lengcwethi ecubungula ezombusazwe uMnu Walter Nsununguli Mbongolwane othi okwenzakala kucele leMDC elikhokhelwa nguMutambara kukhomba ukubhidlika kwalelibandla.