Imali entsha esanda kuphawulwa libhanga lesizwe iqale ukusebenza lamuhla kodwa udubo lokusilela kwemali emabhanga akubanga lomehluko. Imali yamatshe ebingasathengi lutho layo iqale ukusetshenziswa lamuhla. Okunengi asikuzweni kuntathelizindaba yethu uThabang Mathebula ekoBulawayo.
Kunjalo nje, amacele e MDC; elikhokhelwa nguMnu. Morgan Tsvangirai, lelikhokhelwa nguMnu. Arthur Mutambara atshele istudio 7 ukuthi asola usibalukhulu webhanga elikhulu lelizwe i Reserve, uMnu. Gideon Gono esithi uhlelo lwakhe olutsha lwemali luyafana lokuthela amanzi emhlane wedada.
Umgcinisihlalo wecele le MDC elikhokhelwa nguMnu. Mutambara, uMnu. Fletcher Dulini Ncube, ugcizelele ukuthi okufanele kwenziwe yikuthi kulungiswe amafekithali ukuthi enze impahla khona eleZimbabwe lizathengiselana lamanye amazwe ukuze umnotho welizwe ukhuphuke.
Uthi imali yeZimbabwe lokhu ingelamandla ingaze ibizwe ngaliphi ibizo, okutshengisa ukuthi ukukhupha ozero lokhu ngokokuncedisa abamabhanga ukuthi bebhale inombolo ezinlutshwana emitshineni yabo.
Uthi uhlelo lolu luthabise uzulu owayegcine imali yamatshe okwesikhatshana ngoba esezakuyathenga-thenga impahla ezimbalwa ngemali-le esivunyelwa ukuthi isebenze ngokusemthethweni njalo ngaphandle kwalokhu akukho okunye okuhle ngohlelo lolu.
kunjalo-nje, inhlanganiso ye Bulawayo Agenda ithi ukudingisisa kwayo kufumanise ukuthi udaba lwemali entsha lujume inengi labantu lungayilindele, osokubangele ukungaqedisisi okukhulu ngayo.
UMnu. Lennox Mhlanga, obona ngokwethulwa kwembiko kulinhlanganido, uchasisela uSithandekile Mhlanga we studio 7 ukuthi abantu abasemadolobheni lemaphandleni balwemukela njani udaba lwemali entsha le.