EleSouth Africa selikhuthaze iZimbabwe ukuthi ibumbe uhulumende ozagoqela amabandla wonke ezombusazwelisithi ngoba indlela izinto eziyiyo yona manje kwezombusazwe kayiphathisi ekuqedeni inhlupho ezibhekane lelizwe.
Ekhuluma lamhlanje ePretoria ngemva kokuqhuba umhlangano lomunye wakhe waseBhilithani, uMnumnzana David Miliband, umphathintambo obona ngozebudlelwano lamanye amazwe kwele South Africa uNkosazana Dlamini Zuma uthe uhulumende wakhe ukholwa ukuthi iZimbabwe idinga uhulumende ogoqela amacele wonke ezombusazwe njalo oqakathekisa indima okufuze bayidlale elizweni. Lobanje oka Zuma eyiphikile impiko yabezindaba kuleli ebisithi uMongameli Thabo Mbeki uvumelene lenkokheli yamazwe e G8 ukuthi kakulahulumende obusa ngokusemthethweni manje eZimbabwe, ukufithizele ukuthi isimo esikhona kwezombusazwe eZimbabwe manje kasisoke sisize muntu.
Ezinye Indaba ngesiNdebele...