Umanyano weUnited Nations ukhangelelwe ukwethulela umongameli Robert Mugabe lohulumende wakhe izijeziso kuliviki.
I United Nations Security Council iqale umhlangano wayo lapha emelika lamuhla ihlaziya udaba lokuthi ijezise uhulumende kaMugabe kumbe hatshi. Sikhuluma nje lumhlangano uqhubekela phambili esigodlweni seUnited Nations e New York, lapho umeli weFrance kulesisigodlo uMnu Jean-Maurice Ripert atshele intatheli ukuthi i Security Council ithukuthele ngodaba lweZimbabwe njalo ilakho ukujezisa uMugabe leziphathamandla zikahulumende wakhe kabuhlungu.
Uthi njalo isinqumo esithethwe ngumanyano wamazwe athuthukileyo owe G8, ohlangana lenkokheli yamazwe ayisikhombisa aweAfrica kwele Japan, esokuthi uMugabe kumele ejeziswe kabuhlungu – siveza sobala ukuthi amazwe omhlaba alokuvumelana ngamanyathelo amele athathelwe uMugabe.
Uthi laloba amazwe ezwekazi leAfrica engasekeli inyathelo leli i United Nations ilakho ukuqhubeka ngenyathelo lokujezisa uMugabe. Udaba lokujezisa uhulumende kaMugabe lukhwezwe yiMelika e United Nations ngeviki edluleyo. Zingethulwa lezizijeziso kuzakuba kungokwakuqala ukuthi lumanyano ujezise uMugabe.
Ingcwethi ecubungula ezombusazwe uMnu Mandlenkosi Gatsheni uthi iUnited Nations ingazethula lezizijeziso, zilakho ukubamba uMugabe ngamandla ukuthi akhulumisane leMDC kwenziwe ukhetho olutsha olukhululeikleyo