Inhlanganiso ye International Cricket Council (ICC), yona eqale umhlangano omkhulu eDubai lamuhla ikhangelelwe ukuphuma lesinqumo kusasa sokuthi iqembu leZimbabwe Cricket limiswe ukuba lilunga lalinhlanganiso na kumbe hatshi.
Amazwe athi iSouth Africa le England esule ubudlelwano bawo leZimbabwe ngeviki edluleyo esithi kathakazeleli umumo wezombusazwe okhona, okulinyathelo elisekelwe ngumkhokheli weICC uMnu Ray Mali yena okhankasela ukuthi iZimbabwe ixotshwe kuICC.
Ukuxotshwa kweZimbabwe ku ICC kutsho ukuthi iqembu leCricket kalisenelisi ukuphatheka emidlalweni eqoqwe yilinhlanganiso. Kodwa imbiko evela eDubai ithi ukuxotsha iZimbabwe kukhanya kuzakuba nzima ngoba amazwe angempumalanga, ekhokhelwa yi India athi kavumelani lalumbono.
Ingcwethi ecubungula ezemidlalo yeCricket uHeartwell Tshuma utshele uNtungamili Nkomo weStudio 7 ukuthi laloba ekunanzelela ukuthi izijeziso ezethulelwa iqembu leCricket ziphazamisa abadlali hatshi uhulumende kamongameli Mugabe, uyalisekela inyathelo lokujezisa iZimbabwe kwezemidlalo ngoba kungeyinye yemizamo yokubamba ngamandla uhulumende ukuthi aguqule izenzo zakhe.