UMongameli welinye icele le MDC uMnumzana Morgan Tsvangirai uthembise uzulu weZimbabwe ukuthi engangena embusweni uzabumba inhlanganiso ezahlolisisa ukwephulwa kwelungelo loluntu elizweni, i Truth and Reconciliation Commission. Ekhuluma embuthanweni wokubumba isikhwama semali yokuphathisa labo abahlukuluzwa nguhulumende kaMongameli Robert Mugabe ngemva kokhetho lukaMarch, uTsvangirai uthembise njalo ukuthi nxa esebusa uzabumba isikhwama sokuphathisa abahlaselwa yiGukurahundi, labadilizelwa izindlu ngesikhathi seMurambatsvina.
Kodwa abanye esikhulume labo esigabeni selemandebeleni basola amazwi kaTsvangirai la besithi yindlela yokuhuga abantu ukuthi bamvotele kukhetho oluzayo lwe Run- Off. UBrenda Moyo weStudio 7 ukhulume lengcwethi ecubungula ezombusazwe uMnumzana Thompson Mkhwananzi, othi uTsvangirai kumele aqale akhulumisane lalabo ababhekana lodubo ngesikhathi seGukurahundi, azwe ukuthi bona bafunani kuqala, andubana akhulume ngokubumba isikhwama semali yokuphathisa laba bantu.