Udlakela oluqhamuke kwele South Africa ngeviki edluleyo izizalwane zakulelolizwe zihlukuluza ezakwamanye amazwe agoqela i Zimbabwe, Mozambique lamanye, lubikwa belunganeno namhlanje ngoba amapholisa abesegcwele indawana yonke ehlolisisa umumo. Udlakela lolu olutshiye izizalwane zakwamanye amazwe zilahlekelwe yimpahla ezinye zibulewe lumemetheke lusukela e Depsloot, Thembisa, Alexandria, Hilbrow, Berea lezinye, izizalwane zeZimbabwe zitshelwa ukuthi azibuyele ekhaya ukuyavota.
I South African Institute Of Race Relations isethue izizatho eziyisitshiya galolunye ezingabe zibangela udlakela lolu. Okwakuqala ithi kubangelwa yikwehluleka kukahulumende ukulondoloza umthetho. Ukungena kwabantu abavela kwamanye amazwe lula kwele South Africa.
Ukungethembeki kweziphathamandla zikahulumende kaMongameli Thabo Mbeki. ukusilela kwemisebenzi, lokusweleka kwemfundo ebantwini abanengi. Ukungathuthuki kwezomnotho lakho kubikwa kungezinye izizatho zobudlwangudlwangu lobo, lokwehluleka kukahulumende ukuthuthukisa impilo kazulu. Inkethabetshabi lobandlululo ngokunye okubikwa kubangela udlakela. Intathelizindaba yeStudio 7 uBenedict Nhlapho ulandisa ngokwenzakale namhlanje, ese Johannesburg, South Africa.
Kunjalo nje iStudio 7 ikhulume lesizalwane se Zimbabwe, umfana osakhulayo ohlala emzini weThembisa kwele South Africa, u Lovemore Lizani. ULovemore uthi uphunyuke engozini yokuhlaselwa ngabe South Africa abalwisana lezizalwane zakwamanye amazwe esithi usehlalela evalweni.