Inhlanganiso emela izizalwane zeZimbabwe ezisemazweni i Zimbabwe Exiles Forum isola kakhulu uhlangothi olubona ngokuqhutshwa kokhetho iZimbabwe Electoral Commission ngokuphuza ukwethula impumela yokhetho lukaMongameli. inhlanganiso le ithi okwakhathesi i ZEC ilokhe ingakazisi ukuthi izakwethula nini impumela le osokubambelele kakhulu izizalwane zeZimbabwe ezisekhaya, lezihlala kwamanye amazwe.
Embikweni owethulwe nguNkosazana Anna Moyo igqwetha elisebenzela i Zimbabwe Exiles Forum, kucaca udaba lokuthi izizalwane zeZimbabwe ezinengi zizimisele ukubuyela ekhaya kungavele kwethulwe impumela yokhetho ekhomba ukuza kwenguquko elizweni.
Kunjalo nje iStudio 7 ikhulume lezizalwane zeZimbabwe ezimbili ezihlala kwele South Africa. Owakuqala nguMnumzana Thomas Ncube othi uzimisele ukubuyela ekhaya nxa uMnumzana Morgan Tsvangirai engangena embusweni. Siphinde sakhuluma loMnumzana K B Mthunzi laye ose South Africa, othi ukhangelele ukubuyela ekhaya ukuyazisebenzela, lokuthuthukisa ilizwe.